फ्लोरिकल्चर एसोसिएसन नेपालद्वारा आयोजित २६ औं फूल प्रदर्शनी काठमाडौँको भृकुटीमण्डपमा सुरु भएको छ। यो प्रदर्शनी १४ मार्च (आज) देखि १७ मार्च सोमबारसम्म चार दिनसम्म चल्नेछ। प्रदर्शनी “स्वच्छ वातावरण र आर्थिक समृद्धिकालागि पुष्प व्यवसाय” भन्ने मूल नाराका साथ आयोजना हुदैँ छ।
चार दिने प्रदर्शनीमा स्थानीय विक्रेताहरूद्वारा उत्पादित फूल र बोटबिरुवाहरू प्रदर्शन र बिक्री गर्ने ८२ स्टलहरू छन्। आगन्तुकहरूले प्रदर्शनीमा ६०० प्रकारका भित्री र बाहिरी राखिने सजावटी बिरुवाहरू, ५०० प्रकारका फूल र फलफूलका बिरुवाहरू, ३०० प्रकारका सिरेमिक र प्लास्टिकका भाँडाहरू र २०० बागवानी र टेरेस खेतीका आवश्यक सामग्रीहरू हेर्न र बुझ्न सक्ने छन्।
कार्यक्रममा उत्कृष्ट भूदृश्य, मौसमी फूल, सजावटी बोटबिरुवा, फूल फुल्ने बिरुवा, पुष्प सजावट, र काटिएका फूलहरू (जस्तै गुलाब, जरबेरा र कार्नेशन) जस्ता विधामा नर्सरी व्यवसायी बीचको प्रतियोगिताहरू पनि समावेश छन्। विजेताहरूले नगद पुरस्कार र प्रमाणपत्र प्राप्त गर्नेछन्।
प्रदर्शनीले आकांक्षी उद्यमीहरू, विद्यार्थीहरू र फूल सम्बन्धि रुचि राख्ने अनुसन्धानकर्ताहरूलाई प्लेटफर्म प्रदान गर्ने अपेक्षा गरिएको छ।
