नेपाल इन्भेष्टमेन्ट मेगा बैंक (एनआईएमबी) ले वित्तीय समावेशीकरण र पहुँचको दिशामा कदम चाल्दै ‘एनआईएमबी स्मार्ट ॠण’ को उन्नत संस्करण सार्वजनिक गरेको छ, जुन एनआईएमबी स्मार्ट मोबाइल बैंकिङ एपमा उपलब्ध नयाँ मोबाइल ॠण सुविधा हो। यसमा ग्राहकहरूले धितो कागजी प्रक्रिया, वा बैंकमा नगइकनै, सिधै एनआईएमबी स्मार्ट एप प्रयोग गरेर ५ लाख रुपैयाँसम्मको ॠण प्राप्त गर्न सक्नेछन्।
एनआईएमबी स्मार्ट एपमा ग्राहकहरूले इमेल ठेगाना प्रमाणित गरेर सजिलो रूपमा दर्ता प्रक्रिया पूरा गरी एनआईएमबी स्मार्ट ॠण सुविधा प्रयोग गर्न सक्नेछन्। यस ॠण सुविधाको योग्यता बैंकले विभिन्न मापदण्ड अनुसार निर्धारण गर्छ, जस्तै: तलब खाता, नियमित कारोबार, बैंकमा कुनै बक्यौता ॠण नहुनु, र ॠण भुक्तानी व्यवहार।
योग्य ग्राहकहरूले एनआईएमबी स्मार्ट एपको ड्यासबोर्डमार्फत यो सेवा अन्तर्गत स्मार्ट लोनको लागि आवेदन दिन सक्नेछन्।
बैंकद्वारा निर्धारण गरिएको ॠण सीमा अनुसार योग्य खाता धारकहरूले व्यक्तिगत रूपमा ॠण सुविधाको लाभ उठाउन सक्छन्। ॠण तिर्न लचिलो भुक्तानीको सुविधा पनि छ, जसमा ग्राहकहरूले १ महिना वा ३६ महिना सम्मको अवधि छनोट गर्न सक्नेछन्। यसका साथै, यो सेवामा पूर्व भुक्तानीको विकल्प पनि उपलब्ध छ।
